DECÁLOGU
Localizaciones
Actúa responsablemente al escoyer les localizaciones del rodaxe, teniendo en cuenta la llexislación ambiental existente, n'especial si hai una figura de protección específica del entornu.
MÍNIMO IMPACTU
En casu de convivencia con vecinos y comercios que puedan vese afectaos pol rodaxe, ye mester informalos primero mesmo qu'embrivir la contaminación ambiental, acústica y/o llumínica xenerada. Ten en cuenta si hai dalgún recursu patrimonial o natural pa delimitalu y protexelu bien. Amás, promueve nel to equipu una actitú cívica de práctiques cotidianes, evitando que s'empuerque la vía pública.
PROVISORES "VERDES"
Trata d'escoyer provisores locales sostenibles que la so actividá nel entornu tenga un impactu negativu nulu o mínimu, como por casu empreses de catering locales con práctiques sostenibles, qu'eviten l'usu de productos desechables y l'esperdiciu de comida, que fomente'l consumu de productu local, de temporada, orgánicu etc.
AGOSPIAMIENTU
Escueye hoteles o agospiamientos próximos a la principal localización o localizaciones del rodaxe o centros operativos, y da preferencia a aquellos con certificación d'agospiamientu sostenible, o que promuevan bones práctiques a nivel medioambiental nel sector turísticu.
PROXIMIDÁ
Fomenta l'empléu local contratando na mayor midida posible personal autóctono, tanto profesionales del sector audiovisual como de provisores de servicios ayacentes –arriendu d'equipos y vehículos, compra de productos, etc-. Ye la manera d'ufiertar una torna positiva al territoriu que te acueye.
REDUZ, REUTILIZA Y RECICLA
Incorpora la clásica riegla de les trés erres al to rodaxe: Reduz -utilizando solo los recursos necesarios y evitando la compra de productos d'usar y tirar-, Reutiliza -decoraos, vestuariu o otros materiales y promueve el compostaxe de los residuos orgánicos- y Recicla –por aciu contenedores estremaos- depositando cables, metales, atrezzo o otru equipu técnicu defectuosu ya inservible nún de los Puntos Llimpios de COXERSA espardíos per tola rexón.
TRESPORTE
Trata d'amenorgar al máximu la distancia ente l'agospiamientu y centros operativos del rodaxe o'l set, y fomenta l'usu de vehículos de baxes emisiones (eléctricos o híbridos) o'l tresporte compartíu, evitando l'usu individual o places vacíes nesos vehículos. Coles mesmes, suministra información sobro les alternatives del tresporte públicu a los miembros del to equipu.
CONSUMOS
Puedes optimizar el consumu d'enerxía apostando por dispositivos de baxu consumu o promoviendo rutines de correctu usu de los equipos, como un apagáu total o desenchufe si nun tán n'usu, evitando la manera stand by. Otramiente, fai un usu eficiente y sostenible de l'agua, evitando envases individuales d'un solu usu, apurriendo recipientes alternativos reutilizables y puntos de rellenáu, y recordando optimizar les descargues de cisternes o l'apertura enllargada innecesaria de grifos.
PLANIA, EVALÚA Y COMUNICA
Prevé la figura d'un green runner que planie la política de sostenibilidá, estableciendo oxetivos y protocolos y realice el siguimientu. Con cuenta de rodaxe, evalúa metes llograes y comunica al traviés de les tos RRSS, web o medios, los valores sostenibles que promovisti. D'esta miente, vas ayudar al espardimientu y normalización d'estes midíes en futuros proyectos audiovisuales.
COMPENSA
Rematáu'l proyectu, compensa la to buelga de carbonu llograda al traviés d'una "calculadora"- por aciu la participación en dalgún "fondu de carbonu" o proyectu medioambiental promovido pola alministración competente, al traviés d'una ONG local o con acciones positives como'l plantíu d'árboles o reforestación de dalguna zona dañada.