Asturies Paraísu Natural Film Commission ye una iniciativa ensin ánimu d’arriquecimientu creada nel 2016 y xestionada dende la Sociedá Pública de Xestión y Promoción Turística y Cultural del Principáu d’Asturies SAU, entidá dependiente de la Conseyería de Cultura, Política Llingüística y Turismu del Gobiernu del Principáu d’Asturies. La Film Commission, con sede en Llaboral Ciudá de la Cultura (Xixón), ye la única iniciativa pública d’esta clas en vigor dientro del Principáu d’Asturies, y tamién miembru de Spain Film Commission.
QUÉ UFIERTAMOS
Asturies Paraísu Natural Film Commission facilita a los interesaos tola información y asesoramientu necesarios pa desenvolver proyectos cinematográficos na rexón. Estes son les sos funciones principales:
- Sofitu na producción y facilitación xeneral del rodaxe.
- Asesoramientu sobre llinies públiques d’ayuda o patrociniu.
- Busca y xestión de localizaciones. *
- Intermediación con instituciones de caltar públicu y priváu.
- Orientación y sofitu na xestión de los permisos de rodaxe y grabación.
- Información de provisores locales audiovisuales y de servicios, y otros aspectos loxísticos.
- Sofitu promocional y de difusión en medios.
- Acciones promocionales n’eventos y mercaos sectoriales.
- Otros servicios complementarios.
*Asturies Paraísu Natural Film Commission nun va participar de nenguna manera na negociación privada de condiciones -incluya o non contraprestaciones económiques- establecida ente partes ayenes a ella, véase productores y/o profesionales audiovisuales con entidaes públiques y/o privaes o propietarios/es d’emplazamientos consideraos como localización de rodaxe.
QUÉ SOLICITAMOS
De cara a la xestión de les solicitúes d’asistencia por Asturies Paraísu Natural Film Commission, les productores o profesionales han presentar tolos datos necesarios pa los trámites consiguientes qu’haya que realizar: datos fiscales y de contactu, detalles de la solicitú, cartes d’apoyu, seguros de rodaxe en vigor, etc.
Les productores o profesionales solicitantes d’apoyu han informar puntualmente sobre los avances, cambeos o actualizaciones de proyectu cola mira d’aforrar conflictos o duplicidaes de xestión con instituciones y persones físiques y/o xurídiques participantes nes xestiones realizaes dende la Film Commission.
Anque los servicios prestaos por Asturies Paraísu Natural Film Commission son de calter gratuitu, pídese a les productores y/o profesionales que presenten una partida de contraprestaciones consistentes en materiales audiovisuales de delles clases, amás de datos de rodaxe, que faciliten el llabor de la Film Commission como ferramienta xestora y ayuden a monitorizar el sector na rexón, amás d’entamar iniciatives concretes pa dar respuesta a necesidaes o facer meyores.
Toles posibles acciones territoriales vinculaes con comunicación y difusión pública d’aspectos rellacionaos col proyectu, la so producción, rodaxe o estrena han alcordase por dambes partes, siempre respetando la confidencialidá de los proyectos en cada fase, y según la estratexa global de comunicación.
Posibles acciones de comunicación que desenvolver, p’alcordar por toles partes:
- Visita de medios de comunicación a rodaxe.
- Rueda de prensa con presencia de representante/s de la productora, miembro/s del equipu artísticu de la producción, autoridá/es de los conceyos participantes y representante/s de la Film Commission.
- Nota de prensa conxunta.
Datos solicitaos n’acabando’l rodaxe (según modelu facilitáu por Asturies Paraísu Natural Film Commission):
- Información detallada sobre provisores locales (audiovisuales y de servicios) contrataos na rexón.
- Desglose de gastos realizaos na rexón, cola mira de monitorizar l’impactu económicu de les producciones audiovisuales n’Asturies.
Cesión de materiales con autorización d’usu non comercial -namás archivísticu y/o promocional pa soportes d’Asturies Paraísu Natural Film Commission-, previos a la estrena:
- Ente 10 y 20 semeyes del rodaxe (making of) nel Principáu d’Asturies, onde se puedan identificar les localizaciones.
- Ente 10 y 20 stills de la producción.
- Clips de videu de les escenes realizaes en localizaciones del nuestru territoriu.
- Póster, dossier, tráiler, clips de videu o cualquier otru material de mena promocional.
Menciones a fecha d’estrena:
- Inclusión d’Asturies Paraísu Natural Film Commission nos títulos de creitu o agradecimientos, bien con mención escrita o inxerimientu de logotipu, según criteriu de la productora.
Igualmente, les productores o profesionales solicitantes, en base a les sos necesidaes, comprométense a que, en situación d’igualdá económica y técnica, van promover preferentemente la contratación de profesionales y empreses asitiaes n’Asturies.